മനയിലാന്‍

ജീവിതം ഒരു ചെറിയ ചോദ്യം ഉന്നയിക്കാന്‍ വേണ്ടി ഭൂമിയിലെത്തിയിരിക്കുകയാണ്. എന്നാല്‍ മറ്റുള്ളവരെ ചോദ്യം ചെയ്തു സ്വയം ചോദ്യം ചോദിക്കാന്‍ ജീവിതം മറന്നും പോയിരിക്കുന്നു! വൈരുധ്യങ്ങളുടെ ഒരു കുത്തഴിഞ്ഞ പുസ്തകമാണ് ഓരോ ജീവിതവും!

കവിത കൊണ്ടളക്കട്ടെ; കാണുന്നതൊക്കെയും!!

Saturday, January 23, 2010

പ്രണയങ്ങള്‍ക്ക്.....

മുറിവ്

                                         നിന്നെ കണ്ടപ്പോള്‍
                            ഞാനെന്തിനാണ്
                            എന്റെ
                            നരച്ച മുടിയെക്കുറിച്ചോര്‍ക്കാനും
                            അലസമായ് കിടന്ന
                            താടി രോമങ്ങളെ
                            തഴുകിയുണര്‍ത്താനും
                            തുടങ്ങിയത്?

                            എന്തിനാണ്
                            ചുളി വീണ
                            ഷര്‍ട്ടിനെക്കുറിച്ചു
                            വേവലാതി പൂണ്ടത്?

                             കണ്ണാടിയെ സ്നേഹിച്ചതും
                             ടാല്‍ക്കം പൗഡറിന്റെ
                             സാധ്യതകളില്‍
                             മയങ്ങാനും
                             തുടങ്ങിയത്?

                             പോളിഷ് ചെയാത്ത
                             ഷൂവിന്റെ നിലവിളികള്‍ക്ക്
                             മനസ്സു കൊടുത്തത്?

                             റോഡരുകില്‍ പുഞ്ചിരിക്കുന്ന
                             കൂറ്റന്‍ ഹോര്‍ഡിംഗിലെ
                             ചര്‍മ സൗന്ദര്യത്തെ
                             കടക്കണ്ണെറിഞ്ഞത്?

                              (എങ്കിലോ
                              ഡിയോഡറന്റുകളുടെ
                              വിലയെക്കുറിച്ചു മാത്രം
                              ടിവി സ്ക്രീനില്‍
                              കാണാന്‍ കഴിഞ്ഞില്ല)

                              മേല്‍ക്കൂരയില്ലാത്ത
                              സ്വന്തം ജന്‍മത്തില്‍
                              പാദമൂന്നി നക്ഷത്രങ്ങളെ
                              പരിചയപ്പെട്ടതും

                              ഹൃദയത്തിന്റെ
                              കറ പിടിച്ച
                              വിജാഗിരിയില്‍
                              എണ്ണ പകര്‍ന്നതും
                              എന്തിനായിരുന്നു?

                              സത്യം,
                              പ്രാണനില്‍ നിന്നു
                              ഓരോ തവണ
                              ചോരയിറ്റുമ്പോഴും
                              ഞാനറിയാതെ പോയതു
                              എന്തിനായിരുന്നു
                              നിന്നെ കണ്ടതെന്ന
                              മുറിവിനെപ്പറ്റിയായിരുന്നു!

ഷഡ്ദര്‍ശനം

കളി

മണ്ണു വാരിത്തിന്നു വന്നാലും

വെണ്ണ മോഷ്ടിച്ചു നടന്നാലും

കണ്ണനെന്നല്ലോ വിളിപ്പു കഷ്ടം

കള്ളനും കഞ്ഞി വെക്കുന്നു ലോകം.

അഴക്

കാറൊളിയാണെങ്കിലെന്തു ചേതം

ഏഴഴകെന്നേ പറഞ്ഞിടേണ്ടൂ

ഏഴഴകയാല്‍ വിളിച്ചിടുമോ

കാറൊളിച്ചന്തമിതെന്തു ന്യായം?

തൊരം*

തുറുങ്കില്‍ പിറക്കലും

തുണി മോഷ്ടിക്കലും

തേരു തെളിക്കലും

തൊരമെന്തു വേറെ നിനക്കീശ്വരാ!

ഭക്തി

വേലയ്കു പോയോരു

പിള്ളേരെയൊക്കെയും

വേണുവൂതിക്കൊണ്ടു

നീ മയക്കി

വേണ്ടാത്ത തോന്ന്യാസ-

മൊക്കെയും കാട്ടിയ

വേണുവിലോലനില്‍

ഞാന്‍ മയങ്ങി

കന്നത്തരം

കാലിക്കിടാവിനു നല്‍കാതെ മോഷ്ടിച്ചു

പൈമ്പാലു നീ കുടിക്കുന്ന ഞായം

ഞാനറിയും പണ്ടേ പോറ്റമ്മ തന്‍ മുല-

പ്പാലു കുടിച്ചു വളര്‍ന്ന കണ്ണാ

കംസന്റെ ചാരത്തു ചെല്ലുവാനീവിധം

കന്നത്തരം കാട്ടണമെന്നതുണ്ടോ?

ചൂരല്‍ക്കഷായം

പീലിയും കോലും ധരിച്ചാലും

പീതാംബരപ്പട്ടണിഞ്ഞാലും

മണ്ണൂ വാരിത്തിന്നു പോയീടിലെന്‍ കണ്ണാ

ചൂരല്‍ക്കഷായമെനിക്കു നൂനം!

* ജോലി

Subscribe to: Posts (Atom)

കാശിയിലെ കടവുകള്‍

പുണ്യനഗരിയായ കാശിയില്‍ ഏതാണ്ട് 84 ഓളം കടവുകള്‍ ഉണ്ട്. ഘട്ട് എന്നാണ് ഈ കടവുകള്‍ അറിയപ്പെടുന്നത്. ഇതില്‍ പ്രധാനമായത് ഇവയാണ്: 1. അസ്സി ഘട്ട്, തുളസീ ദാസ് ഘട്ട്, ശിവാല ഘട്ട്, ഹനുമാന്‍ ഘട്ട്, ഹരിശ്ചന്ദ്ര ഘട്ട്, കേദാര്‍ ഘട്ട്, ദശാശ്വമേധ ഘട്ട്, പ്രയാഗ ഘട്ട്, മണികര്‍ണിക ഘട്ട്, പഞ്ചഗംഗാ ഘട്ട്, ആദി കേശവ ഘട്ട് എന്നിവയാണിവ. ഫോട്ടോ: പ്രമോദ് രാജ്

ഓണപ്പാട്ടുകാര്‍

ഓണ നാളില്‍ ഉത്തര കേരളത്തില്‍ സര്‍വസാധാരണയായ് കണ്ടുവരുന്ന ഒരു ചടങ്ങാണ് ഓണപ്പാട്ട്. ഇതു നടത്തുന്നവരെ ഓണപ്പാട്ടുകാര്‍ എന്നാണ് വിളിക്കുന്നതു. പാണന്മാരാണ് സാധാരണയായ് ഈ അനുഷ്ഠാനം നടത്തുന്നവര്‍. വെള്ളമുണ്ടും അതിനു മുകളില്‍ ചുവന്ന കച്ച കെട്ടിയിരിക്കും. കൊട്ടിപ്പാടാന്‍ കൈയ്യില്‍ ഒരു ഉടുക്കും ഉണ്ടായിരിക്കും.

പുരുഷന്മാരുടെ കൈകൊട്ടിക്കളി

സ്ത്രീകള്‍ കൈയടക്കി വെച്ചിരിക്കുന്ന കൈകൊട്ടിക്കളിക്കു ഒരു പുരുഷഭാഷ്യം. പാലക്കാട് ജില്ലയിലെ ശ്രീകൃഷ്ണപുരം പഞ്ചായത്തിലാണ് പുരുഷന്മാരുടെ കൈകൊട്ടിക്കളി സംഘമുള്ളതു. കൃഷിക്കാരും മറ്റ് ജീവിത വൃത്തികളിലും ഏര്‍പ്പെട്ട സാധാരണക്കാരാണ് ഈ കലാരൂപത്തിന്റെ മുന്നണിയില്‍ .

ആട്ടക്കളം കുത്തുക

ഒരു ഓണക്കാല വിനോദമാണു ആട്ടക്കളം കുത്തുക എന്ന കളി. മുതിര്‍ന്ന ആണ്‍കുട്ടികള്‍ക്കുള്ളതാണു ഈ വിനോദം. ഒരു മൈതനത്തില്‍ വൃത്തത്തില്‍ കളം വരയ്ക്കും. ഒരു സംഘം കളത്തിനു പുറത്തും മറു സംഘം കളത്തിനു അകത്തും നില്‍ക്കും. കളത്തിനു അകത്തുള്ളവരെ കളത്തിനു പുരത്താക്കുക എന്നതാണ് കളി. കളത്തിനു അകത്തുള്ളവനെ പിടിയ്ക്കാന്‍ പുറത്തുള്ളവന്‍ വരുമ്പോള്‍ അവനെ അടിയ്ക്കാന്‍ അകത്തുള്ളവന് അധികാരമുണ്ട്. പലപ്പോഴും വാശി മൂത്തു ഈ വിനോദം കൈയ്യാങ്കളി വരെയെത്താറുണ്ട്. കോഴിക്കോട് ജില്ലയിലെ ചാത്തമംഗലത്തു നിന്നും.

തായങ്കളി

ഓണനാളില്‍ കേരളത്തില്‍ വിവിധതരം വിനോദങ്ങള്‍ നിലനിന്നിരുന്നു. അതിലൊന്നാണ് തായങ്കളി. കമ്പിത്തായം എന്നും ഇതിനു പേരുണ്ട്. വിവിധതരം ഓണക്കളികളെക്കുറിച്ച് നാടന്‍പാട്ടും നിലനിന്നിരുന്നു. "ഓണം വന്നാലോ നമ്പൂരാര്‍ക്കെല്ലാര്‍ക്കും വേണം നല്ലൊരു കമ്പിത്തായം ഓണം വന്നാലോ നായന്മാര്‍ക്കെല്ലാര്‍ക്കും വേണം നല്ലൊരു കൈയ്യാങ്കളി ഓണം വന്നാലോ പെണ്ണുങ്ങള്‍ക്കെല്ലാര്‍ക്കും വേണം നല്ലൊരു പാട്തും കളീം ഓണം വന്നാലോ കുഞ്ഞുങ്ങള്‍ക്കെല്ലാര്‍ക്കും വേണം നല്ലൊരു പൂവും പാട്ടും" എന്നിങ്ങനെയാണ് പാട്ടിന്റെ ഗതി. കമ്പിത്തായം അഥവാ തായങ്കളി യഥാര്‍ത്ഥത്തില്‍ ചൂതു കളി തന്നെയാണ്. ഓണക്കലത്ത് സദ്യയുണ്ടതിനു ശേഷം ദേശത്തെ പുരുഷന്മാര്‍ ഒന്നിച്ചിരുന്നു തായങ്കളിയില്‍ ഏര്‍പ്പെടുന്നു. മധ്യകേരളത്തില്‍ ഇപ്പോഴും തായങ്കളി നടത്തപ്പെടുന്നു. മലപ്പുറം ജില്ലയിലെ എടപ്പാളിനടുത്തുള്ള മൂക്കുതല ഗ്രാമത്തില്‍ നിന്നും.

കോല്‍ക്കളി

മെയ് വഴക്കത്തിന്റേയും കൃത്യമായ താളബോധത്തിന്റേയും ഒരുമയെ വിളിച്ചോതുന്ന നാടന്‍ കല. ആധുനിക കമ്പ്യൂട്ടര്‍ ഗെയിമുകളുടെ കാലത്ത് കോല്‍ക്കളിയെപ്പോലുള്ള കലാരൂപങ്ങള്‍ തിരശ്ശീലയില്‍ മറഞ്ഞു പോയ്ക്കൊണ്ടിരിക്കുന്നു.

നമ്മുടെ ഭൂമി, ആകാശം...

തെളിമയാര്‍ന്ന ആകാശം കണ്ടും പച്ചപ്പാര്‍ന്ന ഭൂമി കണ്ടും ജീവിക്കുക എന്നത് നമ്മുടെ അവകാശമാണ്. എന്നാല്‍ ഭൂമിയെ തരിശു നിലമാക്കിയും ആകാശത്തെ മലീമസമാക്കിയും ഭരണകര്‍ത്താക്കളൂം സ്ഥാപിത താല്‍പ്പര്യക്കാരും ഈ ആവാസ വ്യവസ്ഥയെ നശിപ്പിച്ചു കൊണ്ടിരിക്കുന്നു.

ചവിട്ടുകളി

പണ്ടു കാലത്ത് ഓണക്കാലത്ത് കേരളത്തില്‍ പ്രചാരത്തിലുണ്ടായിരുന്ന ഒരു വിനോദമായിരുന്നു ചവിട്ടുകളി. ഇന്ന് ഈ കലാരൂപം അതിജീവനത്തിന്റെ പാതയിലാണ്. തൃശൂര്‍ ജില്ലയിലെ ചവിട്ടുകളി കലാകാരന്‍മാര്‍ അവതരിപ്പിച്ച ചവിട്ടുകളിയില്‍ നിന്നും ഒരു രംഗം.

ഓണപ്പൊട്ടനും ഞാനും....

ഓണക്കാലങ്ങളില്‍ മലബാര്‍ പ്രദേശങ്ങളില്‍ വീടു തോറും കയറിയിറങ്ങി അനുഗ്രഹം ചൊരിയുന്ന ഒരു അനുഷ്ഠാന കലാരൂപമാണ് ഓണപ്പൊട്ടന്‍ . ഓണത്തിന്റെ സര്‍വ ഐശ്വര്യങ്ങളും പകരുക എന്നതാണ് ഓണപ്പൊട്ടന്റെ ലക്ഷ്യം. സംസാരിക്കാത്തതിനാലാവാം ഈ രൂപത്തിനു "ഓണപ്പൊട്ടന്‍" എന്ന പേരുണ്ടായത്. കോഴിക്കോട് ജില്ലയിലെ പേരാമ്പ്രയില്‍ നിന്നും.