ഞാനറിയുന്നൊരു മാമഴത്തുള്ളിതന്‍
നീള്‍മിഴിക്കോണിലെ സ്വപ്നമകലുന്നതും
ഞാനറിയുന്നൊരു തൂമഞ്ഞുതുള്ളിതന്‍
നേരിയ തണുപ്പിന്റെ സ്നേഹമകലുന്നതും!
ഓര്‍മതന്‍ നീല നിലാവല തുന്നിയ
ജാലകം വിട്ടു പിരിയുന്ന കാറ്റിനെ
അന്തിക്കു നാമജപം നെഞ്ചിലേറ്റിയ
നെയ്ത്തിരി വെട്ടം മറയുന്ന മാത്രയെ
ഞാനറിയുന്നു; കിനാവിന്റെ ഏകാന്ത-
ശാന്തിയും മോഷ്ടിച്ച ദുഷ്ട രാപ്പനികളെ!
ആരെയോ നെഞ്ചിലേറ്റിയൊരാതിര-
പ്പൂവും പിണങ്ങിക്കൊഴിഞ്ഞൊരു നാളിനെ
കണ്ണിനാല്‍ കാണുമ്പൊഴൊന്നും പറയാതെ
തേങ്ങിക്കരഞ്ഞൊരെന്‍ മൗനമോഹങ്ങളെ
ഞാനറിയുന്നു; ശിലായുഗ സഞ്ചാര-
വേഗങ്ങളില്‍ നിന്നുമെത്തിയൊരെന്നെയും!
